കുവൈത്ത് സിറ്റി : കുവൈത്ത് അന്താരാഷ്ട്ര വിമാനത്താവളത്തിന് (Kuwait International Airport) നേരെ ഇറാൻ നടത്തിയ ഡ്രോൺ ആക്രമണത്തിൽ നിരവധി പേർക്ക് പരിക്കേറ്റു. ആക്രമണത്തെ തുടർന്ന് കുവൈത്ത് രാജ്യത്തേക്കുള്ള എല്ലാ വാണിജ്യ വിമാന സർവീസുകളും താൽക്കാലികമായി നിർത്തിവെച്ചതായി അധികൃതർ അറിയിച്ചു.
വിമാനത്താവളത്തിന്റെ പാസഞ്ചർ ടെർമിനൽ കെട്ടിടം ലക്ഷ്യമിട്ടാണ് ശത്രുതാപരമായ ഡ്രോണുകൾ എത്തിയതെന്ന് കുവൈത്ത് പ്രതിരോധ മന്ത്രാലയം വക്താവ് ബ്രിഗേഡിയർ ജനറൽ സൗദ് അബ്ദുൽ അസീസ് അൽ ഉതൈബി വ്യക്തമാക്കി. ആക്രമണത്തിൽ ടെർമിനൽ കെട്ടിടത്തിന് ഗുരുതരമായ കേടുപാടുകൾ സംഭവിച്ചിട്ടുണ്ട്. പരിക്കേറ്റവരെ ഉടൻ തന്നെ സമീപത്തെ ആശുപത്രികളിലേക്ക് മാറ്റി. കഴിഞ്ഞ ദിവസം രാത്രി ഇറാനും അമേരിക്കയും തമ്മിൽ പരസ്പരം മിസൈൽ ആക്രമണങ്ങൾ നടത്തിയതിന് പിന്നാലെയാണ് കുവൈത്തിന് നേരെ ഈ ആക്രമണമുണ്ടായത്. കുവൈത്തിലേക്കും ബഹ്‌റൈനിലേക്കും ഇറാൻ മിസൈലുകൾ തൊടുത്തതിന് പകരമായിട്ടാണ് തങ്ങൾ ഇറാന്റെ സൈനിക കേന്ദ്രത്തിന് നേരെ ആക്രമണം നടത്തിയതെന്ന് യുഎസ് മിലിട്ടറി വ്യക്തമാക്കിയിരുന്നു. മേഖലയിൽ കടുത്ത യുദ്ധപ്രതീതി നിലനിൽക്കുന്നതിനാൽ കുവൈത്ത് വിമാനത്താവളത്തിൽ കടുത്ത ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.
38