അബുദാബി : അബുദാബിയിലെ ആരോഗ്യമേഖലയിലെ നിയന്ത്രണ ഏജൻസിയായ ഡിപ്പാർട്ട്മെന്റ് ഓഫ് ഹെൽത്ത് (DoH), പ്രമുഖ ആഗോള മെഡിക്കൽ കമ്പനിയായ ജോൺസൺ ആൻഡ് ജോൺസണുമായി സഹകരിച്ച് എമിറേറ്റ്സ് വ്യാപകമായി അത്യാധുനിക ഇന്റലിജന്റ് സർജിക്കൽ നെറ്റ്‌വർക്ക് സ്ഥാപിക്കുന്നു. ആഗോളതലത്തിൽ തന്നെ ഇത്തരമൊരു സംരംഭം ആദ്യമായാണ് അവതരിപ്പിക്കപ്പെടുന്നത്. അബുദാബിയുടെ ശക്തമായ ഇന്റലിജന്റ് ഹെൽത്ത് ഇൻഫ്രാസ്ട്രക്ചറിനെ അടിസ്ഥാനമാക്കിയാണ് ഈ പുതിയ പദ്ധതി നടപ്പിലാക്കുന്നത്.
എമിറേറ്റിലെ ഓപ്പറേഷൻ തിയേറ്ററുകളിൽ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ കാര്യക്ഷമമായി ഉപയോഗിക്കുക, രോഗികളുടെ ചികിത്സാ ഫലങ്ങൾ മെച്ചപ്പെടുത്തുക, ഡോക്ടർമാർക്കും സർജന്മാർക്കും ആവശ്യമായ ഡിജിറ്റൽ പിന്തുണ നൽകുക എന്നിവയാണ് ഈ ശൃംഖലയിലൂടെ ലക്ഷ്യമിടുന്നത്. ഈ പങ്കാളിത്തത്തോടെ സർജിക്കൽ എഐ സാങ്കേതികവിദ്യകൾ വികസിപ്പിക്കുന്നതിലും പ്രോത്സാഹിപ്പിക്കുന്നതിലുമുള്ള ഒരു ആഗോള കേന്ദ്രമായി അബുദാബി മാറും.