ദുബായ് : പൊതുഗതാഗത സംവിധാനങ്ങളെ അത്യാധുനിക സാങ്കേതികവിദ്യയുമായി ബന്ധിപ്പിക്കുന്നതിൽ മറ്റൊരു ചരിത്രനേട്ടം കൂടി കൈവരിച്ചിരിക്കുകയാണ് ദുബായ്. ലോകത്തെ ആദ്യത്തെ പൂർണ്ണ സജ്ജമായ ആർട്ടിഫിഷ്യൽ ഇന്റലിജൻസ് (AI) സ്മാർട്ട് ബസ് സ്റ്റേഷൻ ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) പുറത്തിറക്കി. മാൾ ഓഫ് ദി എമിറേറ്റ്സിൽ സജ്ജീകരിച്ചിരിക്കുന്ന ഈ സ്മാർട്ട് സ്റ്റേഷൻ, സാങ്കേതിക വിദ്യയും പരിസ്ഥിതി സൗഹൃദമായ പ്രവർത്തന രീതികളും ഒത്തുചേരുന്ന ഒരു ഭാവികാല യാത്രാ കേന്ദ്രമായാണ് രൂപകൽപ്പന ചെയ്തിരിക്കുന്നത്. യാത്രക്കാർക്ക് കൂടുതൽ സുരക്ഷിതവും ലളിതവുമായ യാത്രാനുഭവം നൽകുന്നതിനായി 24 മണിക്കൂറും പ്രവർത്തിക്കുന്ന ഡിജിറ്റൽ സേവനങ്ങളും ഇവിടെ ലഭ്യമാണ്.
മാൾ ഓഫ് ദി എമിറേറ്റ്സ് മെട്രോ സ്റ്റേഷനുമായി നേരിട്ട് ബന്ധിപ്പിച്ചിട്ടുള്ള ഈ പുതിയ ബസ് ഹബ്ബിലൂടെ നഗരത്തിലെ വിവിധയിടങ്ങളിലേക്ക് 11 ബസ് റൂട്ടുകളാണ് സർവീസ് നടത്തുന്നത്. പ്രധാന താമസമേഖലകൾ, വ്യാപാര കേന്ദ്രങ്ങൾ, വിനോദസഞ്ചാര കേന്ദ്രങ്ങൾ എന്നിവയെല്ലാം ഇതിലൂടെ ബന്ധിപ്പിക്കപ്പെടുന്നു. നഗരത്തിലെ പൊതുഗതാഗതം കൂടുതൽ സ്മാർട്ടും പരിസ്ഥിതി സൗഹൃദവുമാക്കുക എന്ന ദുബായിയുടെ ദീർഘകാല നഗര വികസന പദ്ധതിയുടെ ഭാഗമായാണ് ഈ സ്മാർട്ട് ബസ് സ്റ്റേഷൻ യാഥാർത്ഥ്യമാക്കിയിരിക്കുന്നത്. ഇതിലൂടെ വിനോദസഞ്ചാരികൾക്കും പ്രവാസികൾക്കും കൂടുതൽ സൗകര്യപ്രദമായി ദുബായിൽ യാത്ര ചെയ്യാൻ സാധിക്കും.