പഞ്ചസാരയ്ക്ക് പിന്നാലെ ഉപ്പിനും നിയന്ത്രണം; പുതിയ നിർദേശവുമായി യുഎഇ ആരോഗ്യ മന്ത്രാലയം

ജനങ്ങളുടെ ആരോഗ്യം സംരക്ഷിക്കുന്നതിനും ജീവിതശൈലീ രോഗങ്ങൾ തടയുന്നതിനുമായി ഭക്ഷണത്തിലെ ഉപ്പിന്റെ ഉപയോഗം കുറയ്ക്കാൻ പുതിയ കർശന നിർദ്ദേശങ്ങളുമായി യുഎഇ ആരോഗ്യ മന്ത്രാലയം. പഞ്ചസാരയുടെ ഉപയോഗം നിയന്ത്രിക്കാനുള്ള നടപടികൾക്ക് പിന്നാലെയാണ് ഇപ്പോൾ ഉപ്പിനും (Sodium) നിയന്ത്രണം ഏർപ്പെടുത്തുന്നത്. ഹൃദ്രോഗം, ഉയർന്ന രക്തസമ്മർദ്ദം തുടങ്ങിയ ആരോഗ്യപ്രശ്നങ്ങൾ വർദ്ധിച്ചുവരുന്നത് കണക്കിലെടുത്താണ് ഈ സുപ്രധാന തീരുമാനം. റെസ്റ്റോറന്റുകളിലും കഫേകളിലും നൽകുന്ന ഭക്ഷണത്തിൽ ഉപ്പിന്റെ അളവ് കുറയ്ക്കണമെന്നും, പ്രോസസ് ചെയ്ത ഭക്ഷണങ്ങളിലെ ഉപ്പിന്റെ അളവ് കൃത്യമായി രേഖപ്പെടുത്തണമെന്നും മന്ത്രാലയം നിർദ്ദേശിക്കുന്നു. പൊതുജനങ്ങളുടെ ഭക്ഷണശീലത്തിൽ ആരോഗ്യകരമായ മാറ്റങ്ങൾ കൊണ്ടുവരുന്നതിലൂടെ രാജ്യത്തിന്റെ ആരോഗ്യ നിലവാരം മെച്ചപ്പെടുത്താനാണ് സർക്കാർ ലക്ഷ്യമിടുന്നത്.