പുതുവത്സരാഘോഷം;അബുദാബിയിൽ ഹെവി വാഹനങ്ങൾക്കും ലേബർ ബസുകൾക്കും നിയന്ത്രണം

പുതുവത്സരാഘോഷങ്ങളോടനുബന്ധിച്ച് ഗതാഗത തിരക്ക് നിയന്ത്രിക്കുന്നതിനും പൊതുജന സുരക്ഷ ഉറപ്പാക്കുന്നതിനുമായി അബുദാബി നഗരത്തിൽ ഹെവി വാഹനങ്ങൾക്കും ലേബർ ബസുകൾക്കും താൽക്കാലിക നിയന്ത്രണം ഏർപ്പെടുത്തി. അബുദാബി സംയോജിത ഗതാഗത കേന്ദ്രമാണ് (Abu Dhabi Mobility) ഇത് സംബന്ധിച്ച അറിയിപ്പ് നൽകിയത്. ഡിസംബർ 31 ബുധനാഴ്ച ഉച്ചയ്ക്ക് 12:00 മണി മുതൽ ജനുവരി 1 വ്യാഴാഴ്ച പുലർച്ചെ 6:00 മണി വരെയാണ് നിയന്ത്രണം. ഹെവി ട്രക്കുകൾ, നിർമ്മാണ സാമഗ്രികൾ കൊണ്ടുപോകുന്ന വാഹനങ്ങൾ, തൊഴിലാളികളെ കൊണ്ടുപോകുന്ന ലേബർ ബസുകൾ എന്നിവയ്ക്കാണ് നിയന്ത്രണം. അബുദാബി ഐലൻഡിനുള്ളിലും അബുദാബി – അൽ ഐൻ റോഡിലും (E22) ഈ നിയന്ത്രണം ബാധകമായിരിക്കും.