റാസൽഖൈമയിൽ നിന്ന് ഗ്ലോബൽ വില്ലേജിലേക്ക് പുതിയ ബസ് സർവീസ് ആരംഭിച്ചു

റാസൽഖൈമ ട്രാൻസ്പോർട്ട് അതോറിറ്റി (RAKTA) നവംബർ 28 മുതൽ റാസൽഖൈമയിൽ നിന്ന് ദുബായിലെ ഗ്ലോബൽ വില്ലേജിലേക്ക് പുതിയ ബസ് സർവീസ് ആരംഭിച്ചതായി അറിയിച്ചു. ഈ സർവീസ് പ്രധാനമായും വാരാന്ത്യങ്ങളിലാണ് ലഭ്യം. വെള്ളിയാഴ്ച, ശനിയാഴ്ച, ഞായറാഴ്ച ദിവസങ്ങളിൽ മാത്രം പ്രവർത്തിക്കുന്ന ഈ ബസുകൾ റാസൽഖൈമയ്ക്കും ഗ്ലോബൽ വില്ലേജിനും ഇടയിൽ ദിവസേന രണ്ട് റൗണ്ട് ട്രിപ്പുകൾ നടത്തും. റാസൽഖൈമയിൽ നിന്ന് ഉച്ചകഴിഞ്ഞ് 3 മണിക്കും 5 മണിക്കുമാണ് ഗ്ലോബൽ വില്ലേജിലേക്കുള്ള സർവീസുകൾ പുറപ്പെടുക. തിരികെ ഗ്ലോബൽ വില്ലേജിൽ നിന്ന് റാസൽഖൈമയിലേക്കുള്ള സർവീസുകൾ രാത്രി 10 മണിക്കും 12 മണിക്കുമാണ് ലഭ്യമാവുക. ഈ പുതിയ ബസ് സർവീസ് റാസൽഖൈമ നിവാസികൾക്ക് ഗ്ലോബൽ വില്ലേജ് സന്ദർശിക്കുന്നത് കൂടുതൽ എളുപ്പമാക്കും.