ദുബായ് : രണ്ടു വർഷത്തെ ഇടവേളയ്ക്ക് ശേഷം ദുബായിലെ സ്വകാര്യ സ്കൂളുകളിൽ ഗുണനിലവാര പരിശോധനകൾ (Quality assurance visits) അടുത്ത അധ്യയന വർഷം (2026-27) മുതൽ പുനരാരംഭിക്കാൻ വിദ്യാഭ്യാസ റെഗുലേറ്ററായ കെഎച്ച്ഡിഎ (KHDA) ഒരുങ്ങുന്നു. വെറും 24 മണിക്കൂർ മുൻപ് മാത്രം മുൻകൂട്ടി അറിയിച്ച് നടത്തുന്ന ഈ ‘ഷോർട്ട് നോട്ടീസ്’ പരിശോധനകളെ ദുബായിലെ പ്രമുഖ വിദ്യാഭ്യാസ ഗ്രൂപ്പുകളും സ്കൂൾ അധികൃതരും സ്വാഗതം ചെയ്തു.
സ്കൂളുകൾ പരിശോധനയ്ക്ക് വേണ്ടി മാത്രമായി മുൻകൂട്ടി നടത്തുന്ന വൺ-ഓഫ് ഒരുക്കങ്ങൾക്ക് പകരം ക്ലാസ് റൂമുകളിലെ യഥാർത്ഥ ദൈനംദിന പഠന നിലവാരം വിലയിരുത്താൻ പുതിയ രീതി സഹായിക്കുമെന്ന് വിദ്യാഭ്യാസ വിദഗ്ദ്ധർ ചൂണ്ടിക്കാണിക്കുന്നു. 2024-25, 2025-26 അധ്യയന വർഷങ്ങളിൽ പുതിയ സ്കൂളുകൾക്ക് ഒഴികെ ദുബായിൽ പരിശോധനകൾ നിർത്തിവെച്ചിരിക്കുകയായിരുന്നു. മികച്ച സ്കൂളുകൾ പരിശോധനയ്ക്ക് വേണ്ടിയല്ല, മറിച്ച് വിദ്യാർത്ഥികൾക്ക് വേണ്ടി എല്ലാ ദിവസവും ഒരുക്കമുള്ളവരായിരിക്കുമെന്നും പുതിയ രീതി സുതാര്യത വർദ്ധിപ്പിക്കുമെന്നും ജെംസ് എഡ്യൂക്കേഷൻ ഗ്രൂപ്പ് സിഇഒ ഡിനോ വർക്കി വ്യക്തമാക്കി. സ്കൂളുകളുടെ പ്രകടന നിലവാരം അനുസരിച്ച് പൂർണ്ണമായ പരിശോധനയോ അല്ലെങ്കിൽ ഹ്രസ്വമായ മോണിറ്ററിംഗ് സന്ദർശനങ്ങളോ ആയിരിക്കും കെഎച്ച്ഡിഎ നടത്തുക.
