ദുബായ് എയർപോർട്ട്സും സാലിക്കും തമ്മിലുള്ള കരാറിന്റെ ഭാഗമായി, ദുബായ് ഇന്റർനാഷണൽ വിമാനത്താവളത്തിൽ ഈ മാസം അവസാനം മുതൽ എല്ലാ ടെർമിനലുകളിലും ടിക്കറ്റില്ലാത്ത പാർക്കിംഗ് പേയ്മെന്റ് സംവിധാനം നടപ്പാക്കും. 2026 ജനുവരി 22 മുതൽ ടെർമിനൽ 1, 2, 3, കാർഗോ മെഗാ ടെർമിനൽ എന്നിവിടങ്ങളിലെ 7,400 പാർക്കിംഗ് സ്ഥലങ്ങളിൽ സാലിക് ഇ-വാലറ്റ് വഴി പണമടയ്ക്കാം.
എയർലൈൻറേറ്റിംഗ്സ് പുറത്തിറക്കിയ 2026 ലെ ലോകത്തിലെ ഏറ്റവും സുരക്ഷിതമായ എയർലൈനുകളുടെ പട്ടികയിൽ യുഎഇയുടെ എത്തിഹാദ് എയർലൈൻസ് ഒന്നാം സ്ഥാനത്തെത്തി. വിമാനസുരക്ഷ, പ്രവർത്തന മികവ്, ആധുനിക ഫ്ലീറ്റ്, അപകടരഹിത പ്രവർത്തന ചരിത്രം എന്നിവ വിലയിരുത്തിയാണ് പട്ടിക തയ്യാറാക്കിയിരിക്കുന്നത്.
ലോകത്തിലെ ഏറ്റവും സുരക്ഷിതമായ ആദ്യ അഞ്ച് എയർലൈനുകളുടെ പട്ടികയിൽ യുഎഇയിൽ നിന്നുള്ള മൂന്ന് എയർലൈനുകൾ ഇടം പിടിച്ചത് ശ്രദ്ധേയമാണ്. എത്തിഹാദ് എയർവേയ്സിനൊപ്പം എമിറേറ്റ്സ് എയർലൈൻസും ഫ്ളൈദുബായും മുൻനിരയിൽ സ്ഥാനം നേടി.
എയർലൈൻറേറ്റിംഗ്സിന്റെ 2026 ലെ ടോപ് 10 സുരക്ഷിത എയർലൈനുകളുടെ പട്ടികയിൽ എത്തിഹാദ് എയർവേയ്സ്, കാത്തേ പസഫിക് എയർലൈൻസ്, ക്വാണ്ടാസ് എയർലൈൻസ്, ഖത്തർ എയർവേയ്സ്, എമിറേറ്റ്സ് എയർലൈൻസ്, എയർ ന്യൂസിലാൻഡ്, സിംഗപ്പൂർ എയർലൈൻസ്, ഇവാ എയർ, വിർജിൻ ഓസ്ട്രേലിയ, കൊറിയൻ എയർ എന്നിവ ഉൾപ്പെട്ടിട്ടുണ്ട്. ഈ നേട്ടം യുഎഇയുടെ വ്യോമയാന മേഖലയിലെ ഉയർന്ന സുരക്ഷാ മാനദണ്ഡങ്ങളെ വീണ്ടും ലോകത്തിനു മുന്നിൽ അവതരിപ്പിക്കുന്നു.
എമിറേറ്റ്സ് എൻബിഡി ബാങ്ക് ഉപഭോക്താക്കൾക്ക് വാട്ട്സ്ആപ്പിലെ “സീറോ-ഡേ” സുരക്ഷാ ലംഘനത്തെക്കുറിച്ച് മുന്നറിയിപ്പ് നൽകി. അജ്ഞാത നമ്പറിൽ നിന്നുള്ള ഒരൊറ്റ വോയ്സ് കോൾ അറ്റൻഡ് ചെയ്താൽ പോലും സ്മാർട്ട്ഫോൺ ഹാക്ക് ചെയ്യപ്പെടാൻ സാധ്യതയുണ്ടെന്ന് ബാങ്ക് അറിയിച്ചു. ഇത്തരത്തിലുള്ള കോളുകൾ എടുക്കരുതെന്നും, സന്ദേശങ്ങളിലൂടെയോ ഫോൺ കോളുകളിലൂടെയോ ബാങ്ക് ഒരിക്കലും വ്യക്തിഗത വിവരങ്ങളോ പാസ്വേഡുകളോ ആവശ്യപ്പെടില്ലെന്നും ഉപഭോക്താക്കളോട് നിർദ്ദേശിച്ചു.
യുഎഇയിൽ ശൈത്യകാലം അതിന്റെ ഏറ്റവും തീവ്രമായ ഘട്ടത്തിലേക്ക് കടക്കുന്നു. ജനുവരി 15 മുതൽ രാജ്യത്ത് അതിശൈത്യം അനുഭവപ്പെടുമെന്ന് എമിറേറ്റ്സ് അസ്ട്രോണമിക്കൽ സൊസൈറ്റി ചെയർമാനും പ്രമുഖ കാലാവസ്ഥാ വിദഗ്ധനുമായ ഇബ്രാഹിം അൽ ജർവാൻ പ്രവചിച്ചു. വരാനിരിക്കുന്ന 26 ദിവസങ്ങൾ രാജ്യത്ത് കടുത്ത തണുപ്പുള്ള കാലമായിരിക്കുമെന്നാണ് റിപ്പോർട്ട്.
ജനുവരി 12നും 25നും ഇടയിലാണ് സാധാരണ ഏറ്റവും കുറഞ്ഞ താപനില രാജ്യത്ത് രേഖപ്പെടുത്തുന്നത്
ഇത്തിഹാദ് എയർലൈൻസിന് 2025-ൽ റെക്കോർഡ് വളർച്ച. കമ്പനിയുടെ ചരിത്രത്തിലെ ഏറ്റവും ഉയർന്ന വാർഷിക കണക്കുകൾ രേഖപ്പെടുത്തിക്കൊണ്ട് കഴിഞ്ഞ വർഷം 2025 ൽ 22.4 മില്യൺ (2.24 കോടി) യാത്രക്കാരാണ് ഇത്തിഹാദിൽ യാത്ര ചെയ്തത്. യാത്രക്കാരുടെ എണ്ണത്തിൽ 21 ശതമാനം വർധനവാണ് രേഖപ്പെടുത്തിയിരിക്കുന്നത്.
പുതുവത്സര ആഘോഷങ്ങളോടനുബന്ധിച്ച് ദുബായിലേക്ക് റെക്കോർഡ് തോതിലുള്ള സന്ദർശകരുടെ ഒഴുക്ക്. ഡിസംബർ 29 മുതൽ ജനുവരി 3 വരെയുള്ള ആറ് ദിവസത്തിനിടെ 13,70,440 പേരാണ് വിവിധ മാർഗങ്ങളിലൂടെ നഗരത്തിലെത്തിയത്. ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (GDRFA) ആണ് ഈ കണക്കുകൾ പുറത്തുവിട്ടത്.
വാഹനങ്ങൾ ഓടിക്കുമ്പോൾ അതീവ ജാഗ്രത പാലിക്കണമെന്നും സുരക്ഷിതമായ ഡ്രൈവിംഗ് ശീലങ്ങൾ പിന്തുടരണമെന്നും ഡ്രൈവർമാരോട് ട്രാഫിക് ആൻഡ് സെക്യൂരിറ്റി പട്രോൾ ഡയറക്ടറേറ്റ് ആഹ്വാനം ചെയ്തു. ഡ്രൈവർമാരുടെയും മറ്റ് റോഡ് ഉപയോക്താക്കളുടെയും സുരക്ഷ ഉറപ്പാക്കുന്നതിനായി ട്രാഫിക് നിയമങ്ങൾ കർശനമായി പാലിക്കണമെന്ന് മേജർ ഖാലിദ് ഉബൈദ് അൽ സാഹിരി നിർദ്ദേശിച്ചു. ഡ്രൈവിംഗിനിടെ ശ്രദ്ധ തിരിക്കുന്ന തരത്തിലുള്ള അനാവശ്യ ഇടപെടലുകളിൽ നിന്നും പ്രവൃത്തികളിൽ നിന്നും ഡ്രൈവർമാർ വിട്ടുനിൽക്കണം. സ്വന്തം ജീവനും മറ്റുള്ളവരുടെ സുരക്ഷയും അപകടത്തിലാക്കുന്ന പ്രവർത്തനങ്ങൾ ഒഴിവാക്കി ഉത്തരവാദിത്തമുള്ള ഡ്രൈവിംഗ് സംസ്കാരം വളർത്തിയെടുക്കണമെന്നും അധികൃതർ വ്യക്തമാക്കി. നിയമലംഘനങ്ങൾ ഒഴിവാക്കുന്നതിലൂടെ റോഡപകടങ്ങൾ വലിയൊരു പരിധി വരെ കുറയ്ക്കാൻ സാധിക്കുമെന്ന് അദ്ദേഹം ഓർമ്മിപ്പിച്ചു.
ഓൺലൈൻ വഴിയുള്ള ഭീഷണികൾക്കും ബ്ലാക്ക്മെയിലിങ്ങിനുമെതിരെ താമസക്കാർ അതീവ ജാഗ്രത പാലിക്കണമെന്ന് യുഎഇ സ്റ്റേറ്റ് സെക്യൂരിറ്റി ഡിപ്പാർട്ട്മെൻ്റ് മുന്നറിയിപ്പ് നൽകി. സൈബർ കുറ്റകൃത്യങ്ങൾ വർധിച്ചുവരുന്ന സാഹചര്യത്തിൽ, അപരിചിതരിൽ നിന്ന് ലഭിക്കുന്ന സംശയാസ്പദമായ സന്ദേശങ്ങളോടോ ലിങ്കുകളോടോ യാതൊരു കാരണവശാലും പ്രതികരിക്കരുത്. ബാങ്ക് അക്കൗണ്ട് വിവരങ്ങൾ, പാസ്വേഡുകൾ, മറ്റ് വ്യക്തിഗത രേഖകൾ എന്നിവ ആർക്കും കൈമാറരുതെന്നും അധികൃതർ കർശന നിർദ്ദേശം നൽകി. ഇത്തരം ഭീഷണികൾ നേരിടേണ്ടി വന്നാൽ ഒട്ടും വൈകാതെ അധികൃതരെ വിവരമറിയിക്കണമെന്നും സെക്യൂരിറ്റി ഡിപ്പാർട്ട്മെൻ്റ് ഓർമ്മിപ്പിച്ചു. സുരക്ഷിതമായ ഇന്റർനെറ്റ് ഉപയോഗം ഉറപ്പാക്കുന്നതിൻ്റെ ഭാഗമായാണ് ഈ ബോധവൽക്കരണം.
അബൂദബിയിൽ നിന്നും കണ്ണൂരിലേക്ക് പുറപ്പെടേണ്ട ഇൻഡിഗോ വിമാനം മണിക്കൂറുകളോളം വൈകുന്നത് യാത്രക്കാരെ വലയ്ക്കുന്നു. ഇന്ന് ഉച്ചയ്ക്ക് 1:20-ന് പുറപ്പെടേണ്ടിയിരുന്ന ഇൻഡിഗോ 6E 1434 വിമാനമാണ് നാല് മണിക്കൂറോളം വൈകുന്നത്. വിമാനം വൈകുമെന്ന വിവരം അധികൃതർ മുൻകൂട്ടി അറിയിച്ചില്ലെന്ന് യാത്രക്കാർ പരാതിപ്പെട്ടു. കൃത്യസമയത്ത് വിമാനത്താവളത്തിൽ എത്തിയ ശേഷമാണ് വിമാനം വൈകുമെന്ന കാര്യം പലരും അറിയുന്നത്.
ഫുജൈറയുടെ വിവിധ ഭാഗങ്ങളിൽ കനത്ത മഴ പെയ്തു. ഇതോടെ യുഎഇയിൽ ഇന്നത്തെ കാലാവസ്ഥ അസ്ഥിരമാണെന്ന് ദേശീയ കാലാവസ്ഥ കേന്ദ്രം (NCM) മുന്നറിയിപ്പ് നൽകി. ചില പ്രദേശങ്ങളിൽ മേഘാവൃതമായ അന്തരീക്ഷവും ശക്തമായ കാറ്റും അനുഭവപ്പെടാൻ സാധ്യതയുണ്ടെന്ന് NCM അറിയിച്ചു. വാഹനയാത്രക്കാർ ജാഗ്രത പാലിക്കണമെന്നും അധികൃതർ നിർദേശിച്ചു.
