silvya

ദേശീയ ദിനത്തോടനുബന്ധിച്ച് ലഭിച്ച നാല് ദിവസത്തെ നീണ്ട വാരാന്ത്യ അവധി ആഘോഷിക്കാൻ യുഎഇയിലെ താമസക്കാരും സന്ദർശകരും പ്രകൃതി രമണീയമായ വിനോദസഞ്ചാര കേന്ദ്രങ്ങളിലേക്ക് ഒഴുകിയെത്തിയതോടെ രാജ്യത്ത് വൻ തിരക്കാണ് അനുഭവപ്പെട്ടത്. ഷാർജയിലെ അൽ സുഹുബ് റസ്റ്റ് ഏരിയ, റാസൽഖൈമയിലെ ഏറ്റവും ഉയരം കൂടിയ കൊടുമുടിയായ ജബൽ ജെയ്‌സ്, അൽ ഐനിലെ പ്രശസ്തമായ ജബൽ ഹഫീത്, ദുബായിലെ പ്രകൃതിദത്തമായ അൽ ഖുദ്റ ലേക്ക് എന്നിവിടങ്ങളിലെല്ലാം ജനപ്രവാഹം കാരണം ഗതാഗതക്കുരുക്ക് രൂക്ഷമായി. തണുപ്പുള്ള കാലാവസ്ഥയിൽ മലമുകളിലെ കാഴ്ചകളും ക്യാമ്പിങ്ങും ആസ്വദിക്കാൻ കുടുംബസമേതം ആളുകൾ എത്തിയതാണ് തിരക്ക് വർധിക്കാൻ പ്രധാന കാരണം. അവധി ദിനങ്ങളിൽ സുരക്ഷിതമായ യാത്ര ഉറപ്പാക്കാൻ ഗതാഗത നിയമങ്ങൾ കർശനമായി പാലിക്കണമെന്ന് അധികൃതർ പൊതുജനങ്ങളോട് അഭ്യർഥിച്ചിട്ടുണ്ട്.

യുഎഇയുടെ 54-ാമത് ദേശീയ ദിനാഘോഷത്തെ വരവേൽക്കാൻ രാജ്യം ഒരുങ്ങി . ദേശീയ ഐക്യം, കൂട്ടായ്‌മയുടെ കരുത്ത്, പുരോഗതി എന്നിവ പ്രതിഫലിപ്പിക്കുന്ന ചലനാത്മകമായ നിറങ്ങളും പ്രമേയങ്ങളിലുമാണ് നഗരങ്ങൾ അലങ്കരിച്ചിരിക്കുന്നത്.
ആഘോഷങ്ങളുടെ ഭാഗമായി അബുദാബി കോർണിഷ്, അൽ മഖ്ത പാലം തുടങ്ങിയ പ്രധാന റോഡുകളിലും പാലങ്ങളിലും ഒരുക്കിയിട്ടുള്ള അലങ്കാരങ്ങളാണ് ഈ വർഷത്തെ പ്രധാന ആകർഷണം. കഴിഞ്ഞ 54 വർഷത്തെ യുഎഇയുടെ വളർച്ചയെ അടയാളപ്പെടുത്തുന്ന 54 രൂപങ്ങൾ ഇവിടെ സ്ഥാപിച്ചിട്ടുണ്ട്.
സ്ഥാപക നേതാക്കളായ ശൈഖ് സായിദ് ബിൻ സുൽത്താൻ അൽ നഹ്യാന്റെയും ശൈഖ് റാഷിദ് ബിൻ സായിദ് അൽ മക്തൂമിന്റെയും ദീർഘവീക്ഷണത്തെയും പൈതൃകത്തെയും ഓർമ്മിപ്പിച്ചുകൊണ്ട്, ദേശീയ ദിനാഘോഷം പൗരന്മാർക്കും പ്രവാസികൾക്കും ഒരുപോലെ അഭിമാനവും ആവേശവും നൽകുന്ന കാഴ്ചകളാണ് സമ്മാനിക്കുന്നത്.

പൊതു ശുചിത്വ നിയമങ്ങൾ ലംഘിച്ച സാഹചര്യത്തിൽ അബുദാബിയിലെ റെസ്റ്റോറന്റുകൾ, ഗ്രോസറികൾ, സൂപ്പർ മാർക്കറ്റുകൾ ഉൾപ്പെടെയുള്ള 37 സ്ഥാപനങ്ങൾക്ക് അധികൃതർ പൂട്ടിട്ടു. അബുദാബി അഗ്രികൾച്ചർ ആൻഡ് ഫുഡ് സേഫ്റ്റി അതോറിറ്റിയാണ് (ADAFSA) ഈ നടപടി സ്വീകരിച്ച കാര്യം വ്യക്തമാക്കിയത്.
അബുദാബി നഗരത്തിന് പുറമെ, അൽ ഐൻ, അൽ ദഫ്‌റ എന്നീ മേഖലകളിലെ സ്ഥാപനങ്ങളിലും പരിശോധന നടന്നു. പരിശോധനയിൽ ഗുരുതരമായ നിയമ ലംഘനങ്ങൾ കണ്ടെത്തുകയുണ്ടായി. സ്ഥാപനങ്ങളെ പൂട്ടാൻ കാരണമായ പ്രധാന വിഷയം, ഭക്ഷ്യസുരക്ഷയുമായി ബന്ധപ്പെട്ട പൊതുശുചിത്വ നിയമങ്ങളിൽ വരുത്തിയ വീഴ്ചകളാണ്.
ഭക്ഷ്യ സുരക്ഷാ മാനദണ്ഡങ്ങൾ പാലിക്കാതെ പ്രവർത്തിക്കുന്ന സ്ഥാപനങ്ങൾക്കെതിരെ കർശന നടപടിയുണ്ടാകുമെന്നും പൊതുജനാരോഗ്യവും സുരക്ഷയും ഉറപ്പാക്കുന്നതിൽ യാതൊരു വിട്ടുവീഴ്ചയുമില്ലെന്നും അതോറിറ്റി അറിയിച്ചു.