എമിറാത്തി ഒട്ടക സംസ്‌കാരം ലോകശ്രദ്ധയിലേക്ക്

ദുബായ് : കോർപ്പറേറ്റ് ലോകത്തെ മികച്ച കരിയറും ഉയർന്ന പദവിയും ഉപേക്ഷിച്ച് എമിറാത്തി ഒട്ടക സംസ്‌കാരവും മരുഭൂമി ജീവിതവും സ്വന്തം വഴിയായി തിരഞ്ഞൈടുത്തിരിക്കുകയാണ് ഒരു ജർമ്മൻ വനിത. മുൻപ് സ്വകാര്യ കമ്പനിയിൽ റെവന്യൂ വിഭാഗം മേധാവിയായി ജോലി ചെയ്തിരുന്ന ലിൻഡ ക്രോക്കൻബെർഗറാണ് (Linda Kröckenberger) തന്റെ ജീവിതപാത മാറ്റിമറിച്ച് ദുബായിൽ ഒട്ടകസവാരിയും എമിറാത്തി പാരമ്പര്യവും പ്രചരിപ്പിക്കുന്ന പ്രത്യേക പരിശീലന കേന്ദ്രത്തിന് തുടക്കമിട്ടത്. ഹംദാൻ ബിൻ മുഹമ്മദ് ഹെറിറ്റേജ് സെന്റർ സംഘടിപ്പിച്ച 12 ദിവസം നീണ്ട ഒട്ടകസവാരി യാത്രയാണ് ലിൻഡയുടെ ജീവിതത്തിൽ നിർണായക വഴിത്തിരിവായത്.
2021 ജനുവരിയിൽ ദുബായ്-അൽ ഐൻ റോഡിലെ അൽ ലിസൈലിയിൽ ‘അറേബ്യൻ ഡെസേർട്ട് ക്യാമൽ റൈഡിങ് സെന്റർ’ എന്ന സ്ഥാപനത്തിന് ഇവർ തുടക്കമിട്ടു. വെറും 4 ഒട്ടകങ്ങളുമായി ആരംഭിച്ച ഈ കേന്ദ്രത്തിൽ ഇപ്പോൾ 22-ലധികം ഒട്ടകങ്ങളുണ്ട്. പരമ്പരാഗത ഒട്ടകസവാരി രീതികളും ആധുനിക മൃഗസംരക്ഷണ പരിപാലനവും സമന്വയിപ്പിക്കുന്ന ഈ കേന്ദ്രത്തിൽ പുരുഷന്മാർക്കും സ്ത്രീകൾക്കും കുട്ടികൾക്കും പരിശീലനം നൽകുന്നുണ്ട്. പ്രത്യേകിച്ച് സ്ത്രീകൾക്കായി ഒട്ടകപ്പന്തയ പരിശീലനവും ഇവിടെ ഒരുക്കിയിട്ടുണ്ട്.
സ്കൂൾ വിദ്യാർത്ഥികൾക്കായി പ്രത്യേക ബോധവൽക്കരണ പദ്ധതികളും കോർപ്പറേറ്റ് ടീമുകൾക്കായി മരുഭൂമി യാത്രകളും കേന്ദ്രത്തിൽ സംഘടിപ്പിക്കുന്നുണ്ട്. കേവലം സവാരി പരിശീലനം എന്നതിലുപരി എമിറാത്തി പാരമ്പര്യവും സംസ്കാരവും അടുത്തറിയാനും വരും തലമുറയ്ക്ക് അത് പകർന്നുനൽകാനുമുള്ള വേദിയായി ഈ സ്ഥാപനം മാറിയിരിക്കുകയാണ്. 2026-2027 സീസണിൽ കൂടുതൽ വിപുലമായ മത്സരങ്ങളും പരിപാടികളും സംഘടിപ്പിക്കാനുള്ള തയ്യാറെടുപ്പിലാണ് ലിൻഡയും സംഘവും.