ദുബായ് : ദുബായ് ഇസ്ലാമിക് ബാങ്ക് (DIB) തങ്ങളുടെ കന്നി ഇസ്ലാമിക് സിൻഡിക്കേറ്റഡ് ഫിനാൻസിംഗ് സൗകര്യം വിജയകരമായി പൂർത്തിയാക്കി. ഷരീഅത്ത് അധിഷ്ഠിതമായ മൂന്ന് വർഷത്തെ കമോഡിറ്റി മുറാബഹ (Commodity Murabaha) സംവിധാനത്തിലൂടെ 750 മില്യൺ യുഎസ് ഡോളറാണ് ബാങ്ക് സമാഹരിച്ചത്. അന്താരാഷ്ട്ര തലത്തിലും പ്രാദേശിക തലത്തിലുമുള്ള പ്രമുഖ ബാങ്കുകളിൽ നിന്ന് ശക്തമായ പിന്തുണ ലഭിച്ച ഈ ഇടപാടിൽ, ലക്ഷ്യമിട്ട തുകയേക്കാൾ 1.6 ഇരട്ടി (ഏകദേശം 1.2 ബില്യൺ ഡോളർ) അപേക്ഷകളാണ് ലഭിച്ചത്.
ആഗോള സാമ്പത്തിക വിപണിയിലെ അനിശ്ചിതത്വങ്ങൾക്കിടയിലും മികച്ച നിരക്കിൽ തുക ലഭ്യമാക്കാൻ സാധിച്ചത് ബാങ്കിന്റെ സാമ്പത്തിക ഭദ്രതയ്ക്കുള്ള അംഗീകാരമാണെന്ന് ദുബായ് ഇസ്ലാമിക് ബാങ്ക് ഗ്രൂപ്പ് സിഇഒ ഡോ. അദ്നാൻ ചിൽവാൻ വ്യക്തമാക്കി. എച്ച്എസ്ബിസി (HSBC), മിസുഹോ ബാങ്ക് (Mizuho Bank), സ്റ്റാൻഡേർഡ് ചാർട്ടേഡ് (Standard Chartered) എന്നിവരായിരുന്നു ഈ ഇടപാടിന്റെ മുഖ്യ കോർഡിനേറ്റർമാർ. ബാങ്കിന്റെ ദീർഘകാല വളർച്ചയ്ക്കും മറ്റ് ആഗോള സാമ്പത്തിക പങ്കാളികളുമായുള്ള ബന്ധം ശക്തമാക്കുന്നതിനും ഈ ഫണ്ട് വിനിയോഗിക്കും.