ഷാർജ ഗ്രീൻ ബെൽറ്റ് പാർക്കിൽ 1.8 കിലോമീറ്റർ നീളമുള്ള പുതിയ വാക്കിങ് ട്രാക്ക് സജ്ജമായി; പൊതുജനങ്ങൾക്കായി തുറന്നു

ഷാർജ: നഗരത്തിലെ പ്രമുഖ വിനോദകേന്ദ്രങ്ങളിലൊന്നായ ഗ്രീൻ ബെൽറ്റ് പാർക്കിൽ (Green Belt Park) നിർമ്മിച്ച പുതിയ റബ്ബർ വാക്കിങ് ട്രാക്ക് പൊതുജനങ്ങൾക്കായി തുറന്നു കൊടുത്തതായി ഷാർജ മുനിസിപ്പാലിറ്റി അറിയിച്ചു. വ്യായാമം ചെയ്യുന്നവർക്കും ഓട്ടക്കാർക്കും സുരക്ഷിതവും അത്യാധുനികവുമായ സൗകര്യമൊരുക്കുക എന്ന ലക്ഷ്യത്തോടെയാണ് ഈ പദ്ധതി പൂർത്തിയാക്കിയത്. ട്രാക്കിന്റെ നിർമ്മാണത്തിനൊപ്പം പരിസ്ഥിതി സൗഹൃദ വിളക്കുകളും മനോഹരമായ ലാൻഡ്‌സ്‌കേപ്പിംഗും ഇവിടെ ഒരുക്കിയിട്ടുണ്ട്. ഷാർജയുടെ നഗര-ടൂറിസം വികസനത്തിന് അനുസൃതമായി പൊതു ഇൻഫ്രാസ്ട്രക്ചറിന്റെ കാര്യക്ഷമതയും സേവന നിലവാരവും ഉയർത്തുന്നതിനായി മുനിസിപ്പാലിറ്റി നടപ്പിലാക്കുന്ന വിപുലമായ പദ്ധതികളുടെ ഭാഗമായാണ് ഇത് പൂർത്തിയാക്കിയത്. പാർക്കിന് ചുറ്റുമായി 1.8 കിലോമീറ്റർ നീളത്തിലാണ് ഈ റബ്ബർ ട്രാക്ക് നിർമ്മിച്ചിരിക്കുന്നതെന്ന് പ്രോജക്ട് മാനേജ്മെന്റ് ആൻഡ് ഫെസിലിറ്റീസ് മെയിന്റനൻസ് ഡയറക്ടർ എഞ്ചിനീയർ ഹസൻ അബ്ദുൾ റസാഖ് വ്യക്തമാക്കി. അന്താരാഷ്ട്ര തലത്തിൽ അംഗീകരിക്കപ്പെട്ട മാനദണ്ഡങ്ങൾ അനുസരിച്ച് നിർമ്മിച്ച ഈ ട്രാക്ക് സന്ദർശകർക്ക് ഏറ്റവും ഉയർന്ന സുരക്ഷയും ആശ്വാസവും നൽകുമെന്നും അദ്ദേഹം കൂട്ടിച്ചേർത്തു.