ധനകാര്യ സേവന മേഖലയിൽ എഐ വിപ്ലവവുമായി ലുലു മണി; അബുദാബിയിൽ ‘ഇന്നൊവേഷൻ ഹബ്ബ്’ ഉദ്ഘാടനം ചെയ്തു

അബുദാബി: ധനകാര്യ സേവന മേഖലയിൽ ആർട്ടിഫിഷ്യൽ ഇൻ്റലിജൻസിന്റെ (AI) വിപുലമായ സാധ്യതകൾ പ്രയോജനപ്പെടുത്തുക എന്ന ലക്ഷ്യത്തോടെ പ്രമുഖ ഫിനാൻഷ്യൽ ഗ്രൂപ്പായ ലുലു മണി ടെക്നോളജീസ് അബുദാബിയിൽ തങ്ങളുടെ പുതിയ ‘ഇന്നൊവേഷൻ ഹബ്ബ്’ ആരംഭിച്ചു. വെറും വിവരങ്ങൾ കൈമാറുന്ന സാധാരണ എഐ (Agentic AI) എന്നതിലുപരിയായി, സാമ്പത്തിക ഇടപാടുകളിൽ നേരിട്ട് തീരുമാനങ്ങൾ എടുക്കാനും അവ കൃത്യമായി നടപ്പിലാക്കാനും കഴിയുന്ന ‘ആക്ഷനബിൾ എഐ’ (Actionable AI) വികസിപ്പിക്കുക എന്നതാണ് ഈ കേന്ദ്രത്തിന്റെ പ്രധാന ദൗത്യം. അബുദാബിയിൽ നടന്ന ഉദ്ഘാടന ചടങ്ങിൽ ലുലു ഫിനാൻഷ്യൽ ഗ്രൂപ്പ് മാനേജിംഗ് ഡയറക്ടർ അദീബ് അഹമ്മദ് പുതിയ കേന്ദ്രത്തിന്റെ പ്രവർത്തനങ്ങൾക്ക് തുടക്കം കുറിച്ചു. യുഎഇയുടെ നാഷണൽ എഐ സ്ട്രാറ്റജി 2031-ന് കരുത്തുപകരുന്ന ഈ പദ്ധതിയിലൂടെ കൂടുതൽ ലളിതവും വേഗത്തിലുള്ളതും സുരക്ഷിതവുമായ ഡിജിറ്റൽ സാമ്പത്തിക സേവനങ്ങൾ ഉപഭോക്താക്കളിലേക്ക് എത്തിക്കാൻ സാധിക്കുമെന്ന് അദ്ദേഹം വ്യക്തമാക്കി. യുഎഇയിൽ വികസിപ്പിച്ചെടുക്കുന്ന ഇത്തരം അത്യാധുനിക സാങ്കേതികവിദ്യകൾ വരും നാളുകളിൽ ആഗോളതലത്തിൽ ലുലു മണിയുടെ സേവന നിലവാരം ഉയർത്താൻ സഹായിക്കുമെന്നും, സാങ്കേതിക കണ്ടുപിടുത്തങ്ങൾക്കും വികസനത്തിനും യുഎഇ നൽകുന്ന മികച്ച സാഹചര്യമാണ് അബുദാബിയിൽ തന്നെ ഈ കേന്ദ്രം തുടങ്ങാൻ പ്രചോദനമായതെന്നും അദ്ദേഹം കൂട്ടിച്ചേർത്തു.