ദുബായ് : വേനൽക്കാല അവധിക്കാലത്തിന് ശേഷമുള്ള തിരക്ക് കുറഞ്ഞ സാഹചര്യത്തിൽ യുഎഇയിലെ പ്രമുഖ എയർലൈനുകളും ട്രാവൽ ഏജൻസികളും ആകർഷകമായ വിനോദയാത്രാ പാക്കേജുകൾ പ്രഖ്യാപിച്ചു. ഒരാൾക്ക് 1,700 ദിർഹത്തിൽ താഴെ നിരക്കിൽ ആരംഭിക്കുന്ന പാക്കേജുകളിൽ വിമാന ടിക്കറ്റ്, മൂന്ന് രാത്രികളിലെ ഹോട്ടൽ താമസം, മറ്റ് സേവനങ്ങൾ എന്നിവ ഉൾപ്പെടുന്നു. ബാക്കു (1,700 ദിർഹം), തിബിലിസി (1,800 ദിർഹം), യെറിവാൻ (2,000 ദിർഹം), ബാങ്കോക്ക് (2,100 ദിർഹം), കൊളംബോ (2,300 ദിർഹം) എന്നിവയാണ് പ്രധാന കുറഞ്ഞ നിരക്കുള്ള ലക്ഷ്യസ്ഥാനങ്ങൾ. യൂറോപ്യൻ നഗരങ്ങളായ ക്രാക്കോവ്, ആഥൻസ്, മോസ്കോ എന്നിവിടങ്ങളിലേക്ക് 2,500 ദിർഹം മുതലും മൗറീഷ്യസ്, മാലദ്വീപ് തുടങ്ങിയ ബീച്ച് ഡെസ്റ്റിനേഷനുകളിലേക്ക് 4,500 ദിർഹം മുതലുമാണ് ഓഫറുകൾ ആരംഭിക്കുന്നത്. സെപ്റ്റംബർ പകുതി വരെ ബുക്കിംഗുകൾ ലഭ്യമാണ്.
എന്നാൽ പരസ്യങ്ങളിൽ കാണുന്ന പ്രാരംഭ നിരക്കുകൾ വിമാനത്തിലെ സീറ്റുകളുടെയും ഹോട്ടൽ മുറികളുടെയും ലഭ്യതയ്ക്കനുസരിച്ച് മാറാമെന്ന് ബെൽഹാസ ടൂറിസം കമ്പനി ജനറൽ മാനേജർ നറൂസ് സർക്കിസ് വ്യക്തമാക്കി. ബജറ്റ് വിമാനങ്ങളിലെ പാക്കേജുകളിൽ ലഗേജ് ചാർജ്, ഭക്ഷണം, സീറ്റ് സെലക്ഷൻ എന്നിവ ഉൾപ്പെട്ടിട്ടുണ്ടോ എന്ന് ബുക്കിംഗിന് മുൻപ് ഉറപ്പുവരുത്തണം. ക്യാൻസലേഷൻ, തീയതി മാറ്റൽ നിബന്ധനകൾ കൃത്യമായി വായിച്ചു മനസ്സിലാക്കാനും, യാത്രാ തീയതികളിൽ ഇളവുകളുണ്ടെങ്കിൽ നേരത്തെ ബുക്ക് ചെയ്ത് മികച്ച ആനുകൂല്യങ്ങൾ നേടാനും യാത്രക്കാർക്ക് വിദഗ്ദ്ധർ നിർദ്ദേശം നൽകുന്നു.